Mat 17 | TPZ | STEP | O tönim me o pöh poen to oah ee, ke Ieesuß, me e Pitaß, me ra poa tom kea e Jëmis pen Jon. Ee varoe to peah pa tope a pah vakin.

Matthew 17

A Sionin E Ieesuß To Tarih Kakaare

Mak 9:2-13, me Luk 9:28-36

1 O tönim me o pöh poen to oah ee, ke Ieesuß, me e Pitaß, me ra poa tom kea e Jëmis pen Jon. Ee varoe to peah pa tope a pah vakin. 2 Ee to teß ne nën ka sionin e Ieesuß tarih, pareß matan ke en. Ka mataneah ëman va e non manih pa potan. Ko ohop tarih, pareß matan va e non manih po tëkrea. 3 Ke Mosës pen Elaëjaß tavus ee maß, pare vavaato me e ne pe Ieesuß. Ee to vaato vahik me ee peß, 4 ke Pitaß soe ke Ieesuß pan, “Eeh, Sunön, eß to vih non pea to teß no manih kuru, kën se nom iu nom, köß u eoß pa kukön tanu manih. A teß pën, me a teß pe Mosës, me a teß pe Elaëjaß.” 5 E Pitaß to toto avoeß e non, ka unöh kakaare pöm en pee. Ka to taneß maß manuh pa koman a unöh to soe maß pan, “Ivaßih e Koaß vamaman rakah peöß, eöß to iu vi rakah e noß peß, paröß vaeö noß eah, köm se tënan eah, paröm vatet a ma soe peß.” 6 A kukön vamomhë pe Ieesuß to pënton a to, to tataneß non maß pa koman a unöh, ko rikrik rakah e ne po naöp, pare vuß ee manih po oeh. 7 Ivëhkëk, e Ieesuß to nö maß manih pee, pareß pöök rapoë, pareß soe ke rapoë pan, “Sun öm! Paröm koe a naöp.” 8 A kukön vamomhë to taßkë maß, pare ep varoe ee pe Ieesuß to teß e non pehen, no ahikta meh teh to teß me non poan. 9 Ee to këh kunah hah ee maß pa tope pamëh, ke Ieesuß vuhvuh rapoë, pareß soe ke rapoë pan, “Eöm se nat nem soe tavus a tah vaßih nöm to ep maß manuh kin pa tope, keß teß non, ko antoen rakah po poen ne eöß e Koaß Teß Pa Napan Kurus se sun taneß hah po vapeepe.”

10 Ka kukön vamomhë peß hi poë pan, “Suk ataeah ko teß vavaasis to nat i ne o Vavaasis pe Mosës sosoe ne pan e Elaëjaß se vovoh maß?” 11 Ke Ieesuß piun rapoë, pareß sosoe suk non e Jon Tövapupui, ko soe ke rapoë pan, “A soe pee a man, e Elaëjaß to nö voh en maß, pareß vatotoopin vahik voh en pa ma moeh tah kurus. 12 Eß to nö voh en maß, ivëhkëk, a napan to hikta nat ne peß, eteh. Ee to vavatet vaviß e ne pa ma kokoman pee, pare nonok ne a ma vu taateß hat manih peß. A ma vu taateß poë varih se tavus pet ee manih peöß e Koaß Teß Pa Napan Kurus pö ne eöß se teß o kamis.” 13 E Ieesuß to soe vahik vakomanih ka ma vamomhë peß nat poß ee peß to sosoe suk non e Jon Tövapupui.

E Ieesuß To Vatoß Hah A Pah Koaß Oeteß No Oraß Hat To Teß Non Peß

Mak 9:14-29, me Luk 9:37-42

14 E Ieesuß me ra kukön vamomhë peß to hah ee maß, pare tavus hah ee manih pa napan. Ka pah teß nö maß manih peß, pareß vapeoß pasun manih pa mataneah, pareß soe pan, 15 “Sunön, eën onöt e nom pa uruan e koaß oeteß peöß öh? Parën vaßaus eah. A ma tamoaan no a mët hat vëh a kokonoh se öt sih poan, keß vuß en po oeh, ka ma meh poen neß se vuß en po suraß, me manih ruen. 16 Eöß to me maß eah manih pa ma vamomhë pën, kee hikta onöt ne a vatoß poë.”

17 E Ieesuß to piun a soe peß, pareß soe pan, “Eöm varih, eöm to hikta vaman avoeß rakah nem e Sosoenën se vatoß en po teß, eöm a nap hat. O tovih poen nöß se teß vaßpeh me a neöm, me o tovih poen nöß se teß a ma punis peöm? Me maß öm e koaß pamëh manih.” 18 E Ieesuß to siröß a oraß hat pamëh, pareß soe pan, “Tavus këh mah e koaß.” Ka oraß hat pamëh këh tavus poß en maß pe koaß, ka varuß vakomanih no a kokonoh to hik këh en peß, keß vih hah en.

19 E Ieesuß to teß non pehen, ka ma vamomhë peß nö ee maß manih peß, pare hi poë pan, “Emöm hikta antoen nem a veo tavus a oraß hat pamëh suk ataeah?”

20 E Ieesuß to piun a soe pa ma vamomhë peß pareß soe pan, “Eöm to hikta vaman nem a ö ne Sosoenën se vatoß hah e koaß pamëh. Ivëh, nöm to hikta onöt suk nem a veo tavus a oraß hat pamëh. Eöß to soe vaman rakah keoß peöm, o vaman peöm se keh teß va non manih po voaß naon soneß vëh o mastat. Eöm to antoen e nem pa taß a tope vëh, keß se sun taneß manih, pareß nö manuh. Eß se sun, pareß nö en. Ka hik poß ta pah tah nöm se teß toksean nem pa nok.” ^{▼▼A ma pöh teß to nat vi ne po Puk Vapenpen to koman ne pan a meh ö soe to teß non topnin o v20-21. A soe pamëh to soe va non manih, “A taateß va pa hin me a vapenpen a taëën, eß varoe kuru to onöt non a veo a ma vu oraß hat.”}

E Ieesuß To Vapöök Soe En Pa Ö Neß Se Mët, Pareß Sun Hah

Mak 9:30-32, me Luk 9:43-45

22 E Ieesuß me ra ma vamomhë peß to tönun hahah kov ee manih pa muhin va Galiliß, keß soe ke rapoë pan, “Eöß e Koaß Teß Pa Napan Kurus no a teß se vikuh en peöß manih pa koreera nap hat. 23 Ee se ip vamët ee peöß, pare pe ee peöß, ko vakön poen ne eöß se sun taneß hah eoß maß po vapeepe.” A ma vamomhë peß to pënton a soe vaßih, pare tamak rakah ee.

E Ieesuß To Takis Manih Pa Iuun Hinhin Apuh

24 E Ieesuß me ra ma vamomhë peß to nö, pare vos ee manuh pa vöön va Kapaneam, ka napan varih to kokon ne sih a takis moniß va pa Iuun Hinhin Apuh nö ee maß manih pe Pitaß, pare hi poë pan, “E tövavaasis peöm se heß kës en pa takis va pa Iuun Hinhin Apuh? 25 Ke Pitaß piun en pee, pareß soe pan, “A,” ke Pitaß ho en koman iuun pareß hikta vaato avoeß non, ke Ieesuß hi en maß peß pan, “Saëmon, eën koman va nom nih? A nap susunön va po oeh vëh kokon ne a ma vu takis varih petereh? Manih po pus koaß koman pee, keß manih po upöm teß?” 26 Ke Pitaß soe poß en, “O upöm teß ivarih to tatakis ne sih.” 27 Ke Ieesuß soe ke poß poan pan, “Ea ro pus koaß pe Sosoenën hikta se voen no a takis, ivëhkëk, ea to hikta iu vaheve no a nap kokon takis, ivëh, kën se nö manuh pa tonon, parën araß maß. Ka iian vëh nën se rëh momoaan, nën se kap a rivoneah, parën ep a moniß to pet non nën. Parën teß a moniß pamëh parën heß a nap kokon takis. Ka moniß pamëh, eß a takis moniß pea poß.”